O Varaždinu je puno pisano, a 2008. na prijedlog gradonačelnika varaždinski pisci su napisali nekoliko legendi. Iz ciklusa varaždinskih legendi objavljujemo priču Tomislava Ribića Sirena z dravskog otoka koja je objavljena u časopisu Kaj.
SIRENA Z DRAVSKOGA OTOKA
«Vu zeleni noči z dravskim vetrom do severnega vulaza vu grad dohajali bi glasi. Strajski. Nepoznati. Glasi zmešani z šepetajem dravskih valov i dežđa. Kak da je veter svilnatem glasom milo popeval listju vu granami murve. Glasi. Mili, ženski , mameči glasi zdigali su se do vrha gradskega turnja i zginuli gda je turenj odzvonil pet vur zjutraj.Zginuli bi z kmicom. Povlekli se kak nekšni velki val i ni ih več bilo za čuti za belega dneva. »
Tako stoji zapisano u ljetopisu opata Gregora, gvardijana franjevačkog samostana što ih je zapisao u jesen 1686.g.
«Zgorele su se hižice i drvene kurije kaj su ih plemenitaši imali vu dravski hosti. Veliki plamen i dim vidli su se se do varoša. Sluge su išli gasiti ogej, ali nisu ništ mogli pogasiti. Gda su došli, ništ več nesu mogli. Ogej je lizal ostajke drvenih hiž. Jata ftic, mala i krupna divlač iskali su novi dom. Gda je prišla kmica, glasi su skroz ponoreli. Gliboki i kmični, kak da grmi nad rekom, a reka odpira široka vusta i pogata grom. Sikakve čudeži su ljudi vidli vu dravski hosti i na dravskem otoku. Čudovita bitja, vodenduhi, vile, sirene na belemu otoku i riter vu zelenem panciru kaj ih čuvle i štiti. Jenu večer odločil sem proveriti pripovesti. Odišel sem tajnim prolazom kaj pela spod cerkve do kraja grada i zaputil se vu dravsku hostu se do reke.
Tam sem našel nju. Na belemu otoku, vu šašu, spod vrbe. Mladu i lepu. Pol ženska, pol riba. Doge rudlave lasi nesel je veter. Zeleni riter stajal je na obali i čuval stražu. Kak da je čekal da postane ženska i da ju odpela vu svoj svet. Gledal ju je zalubleno.», zapisao je opat Gregor o sirenama i otoku od bijelog šljunka koji se nalazio na mjestu današnjeg dravskog kupališta ili ispred njega.
«Videl sem joj joči zelene kak jezero i gliboke kak zvirajek. Čul sem popevku kaj ju je nesel veter se do varoši. Ljubavnu popevku kaj dekla popevle svem dragom. Glas me je vlekel vu vodu. Mamil. Slatki i prelepi. Mameči. Vabeči. Pomislil sem da me sam Gospod devle na kušju. Pijavice su našnjofale toplu kerv i stale se keliti za me noge. Hodal sam prema joj. Čudežni ženski-ribi. Vitez je čkomel. Hudi vir se stal odpirati. Kak da je čakal na mene da me povleče. Videl sam jezinega oca, gospodara reke, kak ju zovle i gliboki vir vu kojem su nestali. Zanavek. Več nesem čul popevku kaj mi ju je veter nesel. Več nem videl ta oka mila i nežna i to čarobno bitje. Sam je ostal slez na vodi i riba, velka kak kojnj, preletela po zraku. Za jom druga i tretja, i kača ogromanjska. Pijavic ni bilo več. Zginule su kak su i prišle. Riter vu zelenem panceru nestal je vu hosti.»
«Veter je nesel glase nemani, hudob i čudnih bitji. Polnoč je prešla. Našel sem riterov pancer. Zeleni. Hitil ga je z sebe kak kača kožu.
Vu kaj se je pretvoril? - pomislil sem. Je vezda kača , ftič, drevo?! Odkud gledi i vreba na mene črni kak noč?! Morti je vok , netopir? Morti je sam črni , Hudi!?
Riter je odhitil oklop i nestal zanavek. Pobral sem oklop i prinesel ga kovaču Budenu kaj je po mojim naputkimi napravil sirenu koju smo deli znad vulaza vu dučan trgovca Jacominija. Čudež se pak dogodila. Vu noči se pak čula popevka. Nesel ju je veter.
Kak da je sirena, kaj su ju postavili znad dučana, popevala. Videl sem sam kak premikavle vusnicu k vusnici gda prejde naočiti muški. Posle se čula pak pripovest o riteru brez pancera kaj kak duh zgubleni blodi po hosti vu iskaju za sirenom i pancerom. »
*******
Gda su leta gospodnjega 1921. restaurirali sirenu vu njoj su našli balzamerano serce. Nakaj cajtof posle serce je nestalo i nigdo ga nigdar več ni našel. Pripovedalo se da su ga fkrali gradski fačuki i hitili vu Dravu te z tim činom oživeli mertvu sirenu.
Posluhnite glase kaj z dravskim vetrom dohajuju z kmicom, glase kaj zviraju vu mutni i gliboki reki i penjeju se vu nebesa do zvezd . Posluhnite glase! Jih čujete? Je to morti popevka Siren?! Jih čujete… Jih čujete?…..
