JASNA ŠIMUNIĆ
Vu goru po drva smo išli
V jutri zarana vu goru po drva smo išli,
Tam dauko pod Ivajnščicu čez brege i dole,
Črne su tam šume i hitri potoki v Železnici,
Dugo je trebalo iti i ni se vidlo nit hiže ni pole.
Dedik su još hčera večerku kola složili,
I vezda vu kmici su čakale Vidra i Lasta,
Boge kravice buju drva dovlekle iz gore,
Od tam de ima grabrov, bukvi i hrasta.
Duknula sam s postele kaj nedu brez mene,
Pak su me k teci Ljubi na brijeg poslali,
Predi vsimi da odidem hitro po cesti k njimi,
Kaj ih zbudim če su morti oni zaspali.
Bosa sem po glibokoj, mefkoj prašini hodila,
Tu pa tam se svetil kakšni obločec na hižici,
Rosa se ko drago kamenje po prahu svetila,
Zajdne su zvezdice žmirkale na nebu vu kmici.
Dvoja kola s kravami na dugi put su išla,
Mene i bratića Marjana na kola su poseli,
I s povezitnim štrikom za ručice zvezali,
Če zaspimo da doli s kol ne opadnemo .
Kaj bi ja zaspala, prvi put bum zorju vidla,
Tolko su mi o njenoj lepoti povedati znali,
Gda se razdenilo bude, kitice bum gledila,
Ko zna kaj bum vse vidla i kojk bumo hodali.
Drvena su se kola drencala čez meglu;
Bu se meni vu toj belini ispunil davni sen?
Kad najemput, bledo sunce se pokazalo,
Poluknalo iza brega, i bil je beli dien.
Nikaj ta zorja, baš nikaj, posebnega ni bila,
I dale se tenka meglica leno povijala,
Sam su bregi i šume zvirali v daljini,
Rosna trava s travom još je trdo spala.
Put se prek senokošah v šumu otpravil,
Najemput se plitki potok razleval prek puta,
Krave su zastale i bistru vodu si srkale,
Čez listje i vienke kazala se svetlost žuta.
Drveni plot i lesa su nam put pregradili,
Vu tuđe dvorišče dedik su krave zapelali,
S domačima se lepo pospominal i zahvalil,
Pa smo na drugu lesu znova na put spelali.
Granje, svrži, listje je viselo nad nami
I dragalo po glavi dedika, babicu, i krave ,
A Marik i ja smo po šumi vrganje iskali,
Po nakli su cvele kitice vsih feli i farbi.
Nazajdnje smo zišli vu dedikovu šumu,
Porušene bukve su ležale v dračju na zemli,
Lanjsku zimu su ih dedik i moži zrušili,
Pa su ih vezda tesali i na kola dijevali.
Ja sam pazila na krave zvezane za bukve,
Kitice sam brala i črlene ciklame dišala,
Sva sila mrtulov je lijetala okoli mene,
Mi se denis čini kak da sam to senjala.
Popentrala sam se na vrh brijega,
Sve zeleno, bujno kud ti oko seže,
Čarolija mog Zagorja nigdar pozabljena,
V njedrima me velke gore Ivajnščice.
Popoldan
Na ledini pod jabukami i slivami
Drobna plava metvica je dišala,
Babica je popoldan gujcike pasla
I v črni fortuf hruške pobirala.
Slatke hruške i slive za dedika,
Za stolom pod orehom je dremal,
V štali su lačne krave mrcale
I mesec mladi ziti se spremal.
Polefko se vreme vleklo k večerki,
Nahranit bo treba pajceke i krave,
I mladinu pozvati i koruzu dati,
Jer nišče ne živel sam od trave.
Klasinje je babica v šparet porinula,
Su Nena i Jasna lačne takaj:
„A vam par jajci spečem?“
Zlate rieči naše babice Magde!
Jabuke su cvele
Došla sam stiha jedno dišeće jutro,
Ledina je kak mladenka belu opravu mela,
Cvet na cveteku, rožica na rožici,
Venka na venki do nakli je vsela.
Tak bele, ruozne dišeće kitice
Čmelam i meni povedat su štele:
„Dojdite, dojdite predi neg veter puhne,
Latice bele v travu buju sele.“
Najenput, zbudil se vetrek i zazibal
Žmehke grane jabukina cvetja,
Kak snegec beli su zletele
I tancale v zraku latice protuletja.
Tolku lepotu i dragost sem doživela,
V trnacu mog dedika i babice,
Kak pjana od sreće po njem hodila,
Rožice dragala, dišala i kušovala.
Nigdar nis pozabila, vu srcu sem skrila
Zeleno Zagorje, moj predragi kraj,
Po belom svetu sem skrivečki nosila
Šume, senokoše, moj ljubljeni kaj.
Vezda sam tak dauko od njega,
To plavo morje vsaki dien gledim,
Al čim nekaj povedat hočem,
KAJ je mila rieč štere se zmislim.
I zato pišem te bogečke stihe,
A vse je prešlo i nekam zginulo,
Ni već onog cvetja po senokošah,
Zarasle se Pitvice, vse je minulo.
Samo vu mojem oku i srcu
Vse to još navek živi,
I bude tak dogo, dogo,
Dok moja popevka zvoni!
